Baş baýlygyň goragynda
Berkarar döwletiň täze eýýamynyň Galkynyşy döwründe hormatly Prezidentimiziň baştutanlygynda ýurdumyzda halkyň saglygyny goramaga aýratyn uly üns berilýär. «Pähim-paýhas ummany Magtymguly Pyragy» ýylynda ýurdumyzyň saglygy goraýyş ulgamynda ýerine ýetirilen beýik işler il-halkymyzyň alkyşyna mynasyp boldy. Paýtagtymyzda türkmen halkynyň Milli Lideri Gahryman Arkadagymyzyň gatnaşmagynda 400 orunlyk Halkara sagaldyş-dikeldiş merkeziniň we 250 orunlyk Halkara fiziologiýa ylmy-kliniki merkeziniň açylyp ulanmaga berilmegi şanly ýylyň taryhy wakalarynyň birine öwrüldi. Ýurdumyzda Milli Liderimiziň başlangyjy bilen kabul edilen «Saglyk» Döwlet maksatnamasynyň çäklerinde ilata ýokary hilli lukmançylyk hyzmatlaryny amala aşyrmak boýunça giň gerimli özgertmeler durmuşa geçirilýär. Iri saglygy goraýyş merkezleriniň gurulmagy, olaryň döwrebap lukmançylyk enjamlary bilen üpjün edilmegi raýatlaryň saglygynyň goralmagyna we dürli keselleriň öňüni almaga gönükdirilen çäreleriň üstünliklere beslenýändigine şaýatlyk edýär.
