«Akylly» şäher konsepsiýasynyň ýörelgeleri esasynda gurlan Arkadag şäheri Gahryman Arkadagymyzyň binýat eden kämil binagärlik eseridir. Bu şäher «Geljegiň şäheri», «Bilimler şäheri», «Ýaşlaryň şäheri» ýaly atlar bilen atlandyrylýar. Olaryň ählisi-de tüýs jüpüne düşen atlardyr.
Sebitde iň iri şähergurluşyk taslamalarynyň biri bolan Arkadag şäheriniň ilkinji tapgyrynda binalardyr desgalaryň 336-sy, şol sanda ähli amatlylyklary özünde jemleýän ýaşaýyş jaýlary, dünýäniň iň kämil enjamlary bilen üpjün edilen çagalar sagaldyş-dikeldiş merkezi, hassahanalar, mekdeplerdir çagalar baglary, edara binalary, inženerçilik ulgamlary we beýleki möhüm ähmiýetli desgalar gurlup, ulanylmaga berildi. Bu ajaýyp şäheriň ýene-de bir aýratynlygy gurlan bilim, saglygy goraýyş, medeniýet, sungat ojaklaryna halkymyzyň görnükli şahsyýetleriniň atlarynyň dakylmagydyr.
