18-nji oktýabrda Türkmenistanyň Beýik Saparmyrat Türkmenbaşy adyndaky Baş akademiki drama teatrynda Türki medeniýetiň halkara guramasyna (TÜRKSOÝ) agza ýurtlaryň II teatr festiwalynyň açylyş dabarasy boldy. Oňa dost-doganlyk ýurtlardan teatr sungatynyň ussatlary, artistler gatnaşdylar. II teatr festiwalynyň açylyş dabarasynyň başynda hormatly Prezidentimiziň bu çärä gatnaşyjylara iberen Gutlagy okaldy.
Soňra dostlukly döwletleriň sungat wekilleriniň festiwala gatnaşyjylara gutlag çykyşlary ýaýbaňlandyryldy. Uly joşgun bilen geçirilýän II teatr festiwaly halklary birek-birek bilen ýakynlaşdyrýar, tejribe alyşmaga, sungatyň inçe syrlaryny öwrenmäge ýardam berýär. Munuň özi dünýä döwletleriniň arasyndaky medeni gatnaşyklaryň täze derejelere göterilýändiginiň ýene bir aýdyň subutnamasydyr.
