Welaýat medeniýet merkezinde Türkmenistanyň Zenanlar birleşiginiň Merkezi geňeşiniň, Kärdeşler arkalaşyklarynyň Milli merkeziniň, ÝUNESKO-nyň işleri barada Türkmenistanyň Milli toparynyň sekretariatynyň, Türkmenistanyň Telewideniýe, radiogepleşikler we kinematografiýa baradaky döwlet komitetiniň bilelikde yglan eden «Türkmen keşdeçilik sungaty ― milli mirasymyz» atly bäsleşiginiň welaýat tapgyry geçirildi. Gelin-gyzlarymyzyň uz barmaklaryndan dörän keşdeçilik sungatyny sarpalamak we ony wagyz etmek maksady bilen geçirilen bäsleşik «Pähim-paýhas ummany Magtymguly Pyragy» ýylyna hem-de halkymyzyň köp asyrlyk medeni mirasy bolan türkmen keşdeçilik sungatynyň ÝUNESKO-nyň Adamzadyň maddy däl medeni mirasynyň sanawyna girizilmegine bagyşlandy.
Bäsleşige onuň etrapdyr şäher tapgyrlarynda ýeňiji bolan zenanlaryň uly topary gatnaşdy. Olar halkymyzyň keşdeçilik sungatynyň taryhy we aýratynlyklary barada gürrüň bermek bilen, ýaka, tahýa, kürte we beýleki el işlerini keşdelemekde ukyp-başarnyklaryny görkezdiler.
