Parahat durmuşda ýaşaýan mähriban halkymyz daşky gurşaw bilen sazlaşykda tebigatyň dilini tapyp ýaşapdyr. Her bir ot-çöpi müň derde derman, ýowşan ysly ýaýlalaryň giňligi, çeşme-çaýlaryň çasly akmasy, joşgunly derýalaryň dolup-daşmasy — bu görnüşleriň ählisinde merdana halkymyzyň göwün giňligi, sylanyşykly häsiýeti, asyrlarboýy saýlap alan ýoluna çäksiz ygrary görnüp dur. Kalby sahy halkymyza eşretler serpaýyny ýapan Berkarar döwletiň täze eýýamynyň Galkynyşy döwri parasat kökleri müňýyllyklara uzaýan ilimiziň bu asylly ýörelgeleriniň gadyr-gymmatyny arşa göterdi. Bu ýörelgeleriň her birimiziň kalbymyzda mäkäm orun almagy kalbymyzy mähir ýylysyna çoýýar.
Tomus paslynyň howasynyň aşa gyzýan günleri tebigaty goramak meselesiniň wajyplygy hasam artýar. Bu zerurlyk, aýratyn-da, tutuş halkymyzyň tükeniksiz mähir-yhlasyndan dörän emeli tokaýlyklary goramakda has-da ýiti duýulýar. Ese-boýa galyp, göreniň gözüni dokundyrýan millionlarça düýp bag şu günki nesilleriň geljege gymmatly serpaýydyr. Türkmenler owal-ahyr öz topragyny mukaddeslik saýypdyr. Parahatçylygyň, abadançylygyň, dowamatyň hatyrasyna asyllylygyň, zähmetsöýerligiň ajaýyp göreldesini görkezipdir. Nesiller bize bakylygyň güwäsi bolan baglary ekendigimiz üçin minnetdar bolarlar. Tebigat bilen ýüzbe-ýüz bolanymyzda, oňa zelel ýetirilmez ýaly, etjek-goýjak hereketimiziň dürs bolmagyny gazanmagymyz gerek. Bizi mähir gujagynda hüwdüleýän tebigatda özüňi dogry alyp barmagyň kadalaryny anyk bilmeli we olary birin-birin ýerine ýetirmegi endik edinmeli. Bu kadalar ýönekeý. Olar adamdan goşmaça güýç-başarnygy, çykdajyny, boş wagty talap edenok. Tebigata çykanyňda, ot ýakmak asla bolanok, eger şeýle edilse, aýratyn-da, ot-çöpli, bag-bakjaly ýerlerde uly ýangynlara sebäp bolmagy ahmal. Birbada başynda dursaň, beýle hadysa bolmaz. Güýçli şemaldan ýa-da ýangyna getirip biljek beýleki ýagdaýlardan habardar bolup, hüşgärligi elden bermeli däl. Eger ot azda-kände ýakylan bolsa, soňuna çenli durup, onuň, hakykatdan-da, öçendigine göz ýetirip, ot ýakylan ýere gum sürüp, közüni mazaly öçüriň! Çalgy ýagy ýa-da ýeňil ýanyjy suwuklyklar siňen matalar, söndürilmedik otluçöp, döwlen çüýşe ýa-da aýna bölekleri taşlansa, Günüň şöhleleriniň ugruny üýtgetmegi zerarly, guran ot-çöpleriň gyzmagy netijesinde, oduň öz-özünden tutaşmagyna getirip bilýändigini unutmaly däldiris. Mundan başga-da, tebigata ulagly çykan adamlar awtoulagyň, hususan-da, onuň tüsseçykarynyň guratlygyny gözden geçirmelidir. Bu enjam ýörite ýangyn söndüriji bilen üpjün edilmelidir.
