Berkarar döwletimiziň bagtyýarlyk döwründe hormatly Prezidentimiziň parasatly, öňdengörüjilikli baştutanlygynda türkmen halkynyň müňýyllyklara uzaýan taryhyny, beýik şahsyýetleriň döredijiligini öwrenmek üçin ähli mümkinçilikler döredildi. Diňe türkmen halkynyň däl, eýsem, dünýä edebiýatynyň ösmegine uly goşant goşan Magtymguly Pyragynyň döredijiligini öwrenmäge hem uly üns berilýändigi guwandyryjy ýagdaýdyr. Hormatly Prezidentimiz halkymyzyň akyldar şahyry Magtymguly Pyragy barada: «Magtymguly Pyragy türkmen nusgawy edebiýatynyň taryhynda täze bir edebi mekdebi döretmegi başaran şahyrdyr. Beýik akyldar özüniň ajaýyp eserleri bilen türkmen dilini we edebiýatyny täze belentliklere göterdi. Nusgawy şahyryň bize goýup giden mirasy özboluşly terbiýe mekdebidir» diýip, örän ýerlikli belleýär.
Magtymguly Pyragynyň dünýä edebiýatynyň altyn hazynasyna giren baý hem-de gymmatly edebi mirasyny, dünýewi garaýyşlaryny, XVIII—XIX asyrlarda türkmen durmuşyna ýetiren uly täsirini ylmy esasda öwrenmek, onuň döredijiliginiň türkmen, şol sanda tutuş Gündogaryň ylmy-medeni durmuşy bilen aýrylmaz baglanyşygyny döwrebap sanly tehnologiýalaryň üsti bilen açyp görkezmek, şahyrana dünýäsine halkara ylmy-edebi jemgyýetçiligiň ünsüni çekmek hem-de beýik akyldaryň doglan gününiň 300 ýyllygyny halkara derejede mynasyp bellemek maksady bilen, hormatly Prezidentimiz 2021-nji ýylyň 12-nji fewralynda Karara gol çekdi. Bu Karara laýyklykda, 2024-nji ýylda nusgawy şahyrymyz Magtymguly Pyragynyň doglan gününiň 300 ýyllygy ýokary derejede guramaçylykly belleniler.