3-nji iýun. Ýurdumyzda, asylly däbe görä, Bütindünýä welosiped güni bellenildi. Birleşen Milletler Guramasynyň senenamasynda mynasyp orun eýeleýän bu halkara baýramy mynasybetli paýtagtymyzda geçirilen köpçülikleýin welosipedli ýörişe hormatly Prezidentimiz Serdar Berdimuhamedow gatnaşdy.
5-nji iýun. Hormatly Prezidentimiz Daşoguz welaýatyna iş saparyny amala aşyryp, ýurdumyzda bitewi halkalaýyn energoulgamyny döretmegiň taslamasynyň çäginde gurlan «Balkan–Daşoguz» ugry boýunça täze howa elektrik geçirijisini we güýjenmesi 500 kilowolt bolan elektrik beketlerini işe girizmek dabarasyna gatnaşdy. Şol gün Daşoguz welaýatynyň Daşoguz şäherinde bina edilen döwrebap ýaşaýyş jaýlary dabaraly ýagdaýda açylyp, ulanmaga berildi. Şeýle-de, Daşoguz welaýatynyň ilatyna ýokary hilli hyzmat etjek 200 sany täze, döwrebap ýolagçy awtobuslary sowgat hökmünde gowşuryldy.
