Ene. Bu sözde jady bar, gudrat bar. Ene diýlen mukaddeslik Zemine deňelýän bakylygyň hut özüdir. Bu mukaddeslik ynsana berlen gudratly peşgeşdir.
Enäniň aladasyna tükenme ýok. Perzendini ile-güne goşýança, enäniň çekýän azaplarynyň haýsy birini agzajagyňy bileňok. Iň bärkisi enäniň ukusyz geçiren ýekeje gijesini göz öňüne getirip görüň! Balasynyň kesp-kärli, il derdine ýaraýan, watanperwer bolup ýetişmegini arzuwlaýan ene çagasy ulalyp, kemala gelenden soň hem ýene şonuň üstünde kökenekdir. Eneler balasy üçin çeken azaplarynyň, gören görgüleriniň hiç biriniň, hiç mahal gaýtargysyny soraýan däldir. Ine, şonuň üçin hem eneler bu Zeminiň mukaddes barlygydyr. Jennet hem eneleriň aýagynyň aşagyndadyr.
