«7/24.tm» №31 (218)29.07.2024
Olimpiadalaryň çempionlary hemişe häzirki zamanda ýaşaýarlar. 100 ýyl mundan ozal geçirilen Olimpiýa oýunlarynyň çempiony hakynda gürrüň edilende hem onuň ady geçen zamanda ulanylmaýar. Olaryň atlarynyň öňüne «ozalky» diýen söz goşulman, «Olimpiýa çempiony» diýip aýdylýar. Elmydama häzirki zamanda ýaşamak diýmek bakylyga gol bulamak dälmi? Elbetde, şeýle. Hut şonuň üçin hem Olimpiadalar hemişe adamzadyň durmuşynda uly ähmiýete eýe bolupdyr. Şol ähmiýetli waka hökmünde garalýan Olimpiýa oýunlary bolsa 1896-njy ýyldan bäri her dört ýyldan bir gezek geçirilip gelinýär. Planetanyň sport baýramyny taryhda 3-nji gezek kabul etmek häzirki zamanyň Olimpiadalaryny gaýtadan dikelden Pýer de Kuberteniň Watany Fransiýanyň paýtagtynyň paýyna düşdi. Fransiýanyň ilkinji gezek Olimpiýa oýunlaryny 1924-nji ýylda kabul edendigini hasaba alsaň, onda bu gezekki oýunlar şol wakanyň bir asyrlyk şanly senesi bilen dabaralanýar.