Jemgyýeti demokratiýalaşdyrmak, milli kanunçylygy berkitmek ýurdumyzda üstünlikli durmuşa geçirilýän hukuk özgertmeleriniň esasyny düzýär. Hormatly Prezidentimiz Gurbanguly Berdimuhamedowyň parasatly ýolbaşçylygynda kanunçylyk ulgamy öňdebaryjy halkara tejribesi esasynda kämilleşdirilýär. Milli Parlamentiň iki palataly ulgamynyň döredilmegi, «Türkmenistanyň Milli Geňeşi hakynda» Türkmenistanyň Kanunynyň kabul edilmegi munuň aýdyň subutnamasydyr.
Ýurdumyzyň gurluşynda täze kanun çykaryjy edara — Milli Geňeşiň Halk Maslahaty döredildi. Şu ýylyň 14-nji aprelinde Türkmenistanyň Milli Geňeşiniň iki palatasynyň birinji bilelikdäki mejlisiniň geçirilmegi Berkarar döwletimiziň bagtyýarlyk döwrüniň dünýä ýaň salan taryhy wakalarynyň biri boldy. Gahryman Arkadagymyz bilelikdäki mejlisde eden çuňňur manyly çykyşynda Halk Maslahatynyň alyp barmaly işiniň esasy ugurlaryny kesgitledi we olaryň üstünde birin-birin durup geçdi.
