Golaýda Türkmenistanyň Merkezi bankynyň welaýat şahamçasynyň mejlisler zalynda welaýat häkimliginiň meýilnamasy esasynda ilatyň arasynda ýurdumyzda hereket edýän kanunçylygy düşündirmek, neşekeşlige hem-de korrupsiýa garşy göreşmek, ýol hereketiniň kadalaryny we düzgünlerini dogry berjaý etmek meselelerine bagyşlanan wagyz-nesihat çäresi geçirildi. Oňa şu edaranyň işgärleri gatnaşdylar.
Hormatly Prezidentimiziň taýsyz tagallalary netijesinde, ýurdumyzda sagdyn durmuş ýörelgesi barha rowaçlanýar. Parahorluga we korrupsiýa garşy hereket etmek, ilatyň beden we ruhy taýdan sagdyn bolmagyny gazanmak, ahlak arassalygyny ündemek maksady bilen, uly işler durmuşa geçirilýär. Şular dogrusynda Türkmenistanyň Merkezi bankynyň welaýat şahamçasynyň başlygynyň orunbasary, bank gözegçiligi bölüminiň başlygynyň wezipesini wagtlaýyn ýerine ýetiriji Öwlüýäguly Gutlyýew, welaýat Polisiýa müdirliginiň 4-nji bölüminiň uly gözegçileri Selbi Saparnazarowa, Näzik Ýusupowa, welaýat prokurorynyň hukuk üpjünçiligi boýunça uly kömekçisi 1-nji derejeli ýurist Bilbil Saparowa, TKA-nyň welaýat birleşmesiniň pudaklar boýunça utgaşdyryjysy Mämmetdurdy Muhamedow, Daşoguz şäher polisiýa bölüminiň ýol gözegçilik bölüminiň wagyz-nesihat işleri boýunça uly gözegçisi Akmyrat Mosanow, döwlet edaralarynyň işgärleriniň kärdeşler arkalaşyklarynyň Daşoguz şäher geňeşiniň başlygy Bibigül Amanowa, TDP-niň welaýat komitetiniň partiýa guramaçysy Täçmyrat Rejepow, TGÝMJ-niň welaýat bölüminiň hünärmeni Maral Täjibaýewa, welaýat narkologiýa hassahanasynyň lukmany Jennet Garaýewa dagy öz çykyşlarynda gürrüň etdiler. Şeýle hem özüňi alyp barmagyň medeniýeti, sagdyn durmuş ýörelgesi, milli kanunçylykda göz öňünde tutulan jogapkärçilikler, zyýanly endikleriň ýaş nesillere ýetirip biljek zyýanlary, «Korrupsiýa garşy hereket etmek hakynda», «Döwlet gullugy hakynda» we «Döwlet gullukçysynyň etikasy we gulluk özüni alyp barşy hakynda» Türkmenistanyň Kanunlarynyň talaplary dogrusynda hem giňişleýin gürrüň edildi. Wagyz-nesihat çäresinde çykyş edenler Gahryman Arkadagymyzyň ynsanperwerlige ýugrulan syýasatynyň barha rowaçlanýandygyny aýdyp, edilýän uly aladalar üçin milli Liderimize hoşallyk bildirip, janynyň sag, il-ýurt bähbitli, dünýä ähmiýetli işleriniň hemişe rowaç bolmagyny arzuw etdiler.
