Babamyrat aga günortanlyk naharyny iýip bolanlaryndan soň, göwnünde beslän niýetini aýtmagyň ýeri geldi hasap etdi. Nahara töwir edensoň, ogullaryna birlaý nazaryny aýlady, soňam göwnündäkini dile getirdi:
— Tüweleme, bu ýyl kärende ýeriňizden alan hasylyňyz çakyňyzdanam gowy boldy. Yhlasam etdiňiz. Şoňa laýyk topragam bereket eçildi. Gazananyňyz ýagşylyga ýarasyn! Eliňize lomaýja pul düşen wagty oňa ýer tutdursaňyz-a gowy bolardy.
