Okamak we kämillik
«7/24.tm», №31 (62), 02.08.2021. Ýazýan adamlar köp okaýarlar, olara «sen okamagy söýýärsiňmi?» diýip sowal bermek gerek däl. Adam öz okan zatlaryna görä eser döredýär we şoňa görä ýaşaýar we haýsydyr bir babatda okan zatlaryna görä-de yz galdyrýar. Şu ýerde gyzykly bir pelsepe bilen gabatlaşýarys. Siz ýazýan adamyň öz ýoluny, stilini tapyşy ýaly, okaýan adamyňam okyjylyk stilini tapyşy hakda, heý, pikir edip görüpmidiňiz? Belki, men bu ahwaly ilki açan adam däldirin, ýöne siz üns berip göräýiň! Okyjylyk babatynda özüne ýörelge kesgitlemedik adam ýazanda hem entek öz ýoluny tapyp bilmedik bolup çykar. Megerem, onda-munda gabat gelýän «Kämil oky-jy» aýtgysy şu hili ýagdaýdan soň ýüze çykan bolsa gerek.