Bagtyýarlyk etrabynyň Garadaşaýak ýaşaýyş toplumyndaky Aşgabat şäheriniň sport we ýaşlar syýasaty Baş müdirliginiň 7-nji sport mekdebi 2015-nji ýylyň 1-nji sentýabrynda işe girizildi. Häzirki wagta bu ýerde ýaşajyk türgenleriň 459-sy sportuň 5 görnüşi – milli göreş, grek-rim göreşi, söweş sambosy, boks, gylyçlaşmak boýunça tälim alýar. Tejribeli tälimçiler tarapyndan her günde iki wagtyna geçirilýän okuw-türgenleşik işleri türgenleriň sportuň inçe tilsimlerini ymykly ele almaklaryna ýardam berýär.
Sport mekdebimizde erkin göreş boýunça halypa tälimçi Annagurban Bäşimow we onuň şägirtleri Ahmet Bäşimow, H.Mämmedow, söweş sambosy boýunça Farhat Nurmetow, Arslan Imamow, Şöhrat Annamuhammedow, grek-rim göreşi boýunça Muhammetmyrat Orazow, gylyçlaşmak boýunça Ahmet Agaýew hem-de birnäçe ýaş ezber tälimçiler okuw-türgenleşik sapaklaryny geçýärler. Sport mekdebimiz etrabymyzdaky orta mekdepler bilen hem ýakyn aragatnaşyk saklaýar. Mekdep okuwçylaryny sporta çekmek maksady bilen, häli-şindi «Men sporty saýladym», «Sport we saglyk» ýaly birnäçe temalarda wagyz-nesihat ähmiýetli gürrüňdeşlikleri geçirýäris. Sport ýaryşlarynda ýeňiji bolan mekdep okuwçylaryny bilim alýan orta mekdebine baryp, Hormat hatlarydyr sowgatlar bilen höweslendirýäris. Orta mekdepler bilen işleşmek sporta höwes bildirýän ýaşlaryň has-da köpelmegine ýardam edýär.
