Berkarar döwletimiziň bagtyýarlyk döwründe Türkmenistan sebit we dünýä derejesindäki halkara sport ýaryşlarynyň yzygiderli geçirilýän merkezine öwrüldi. Ýurdumyzyň ähli ýerlerinde halkara ülňülerine laýyk gelýän, ýokary tilsimatlar we sanly tehnologiýalar bilen enjamlaşdyrylan döwrebap sport toplumlarynyň, häzirki zaman stadionlaryň, atçylyk-sport toplumlarynyň we beýleki desgalaryň bina edilmegi netijesinde türgenlerimiz iri halkara ýaryşlarynda üstünlikli çykyş edip, döwlet Baýdagymyzy belentde parlatmagy başardylar. «Türkmenistan – parahatçylygyň we ynanyşmagyň Watany» şygary astynda mukaddes Garaşsyzlygymyzyň 30 ýyllyk şanly toýunyň bellenilýän ýylynyň başynda «Türkmenistanda 2021 – 2025-nji ýyllarda bedenterbiýäni we sporty goldamagyň hem-de ösdürmegiň Maksatnamasynyň» we ony amala aşyrmak boýunça ýerine ýetirilmeli çäreleriň Meýilnamasynyň kabul edilmegi hem Arkadag Prezidentimiziň ýurdumyzda sporty dünýä derejesinde ösdürmek ugrundaky tagallalarynyň nobatdaky subutnamasydyr.
Gahryman Arkadagymyzyň öňdengörüjilikli syýasatynyň hem-de sport ulgamynda alyp barýan düýpli özgertmeleriniň netijesinde amala aşyrylýan maksatnamalaryň çäklerinde ýurdumyzda olimpiýa ätiýaçlygyny ösdürmek maksady bilen, 2012-nji ýylyň 6-njy aprelinde hormatly Prezidentimiziň gatnaşmagynda Ýaş olimpiýaçylary taýýarlaýyş mekdebi dabaraly ýagdaýda açylyp, ulanmaga berildi. Milli Liderimiziň mekdebiň açylyş dabarasynda Hormatly myhmanlaryň kitabynda galdyran ýadygärlik ýazgysynda «Bu sport mekdebini tamamlajak ýaşlarymyzyň geljekde biziň sport ugrunda başlan beýik işlerimizi, ynsan durmuşynda sportuň we sagdynlygyň ähmiýetiniň örän uludygyny ykrar edýän taglymatlarymyzy Garaşsyz, baky Bitarap Türkmenistan Watanymyzyň Döwlet baýdagynyň astynda belent sepgitlere ýetirjekdiklerine, iri halkara sport ýaryşlarynda altyn medallara we baýrakly orunlara mynasyp boljakdyklaryna berk ynanýaryn» diýlip bellenilýär. Ajaýyp şertler bilen üpjün edilen mekdepde zähmet çekýän ähli mugallymlardyr tälimçiler hem-de bilim we tälim alýan okuwçy-türgenler hormatly Prezidentimiziň belent ynamyna mynasyp jogap hökmünde iri halkara sport ýaryşlarynda üstünlikli çykyş etmek arkaly Watanymyzyň sport abraýyny has-da belende götermek ugrunda yhlas-başarnyklaryny gaýgyrmaýarlar.
