Günsaýyn gülleýän Watanymyzda ähli ugurlar bilen bir hatarda, bedenterbiýe we sport ulgamynda hem uly üstünlikler gazanylýar. Pudagyň hünärmenleri döredijilikli zähmet çekip, ýaş nesliň beden hem ruhy taýdan sagdyn kemala gelmegine, watansöýüjilik ruhunda terbiýelenmegine mynasyp goşant goşýar. Magtymguly Pyragynyň döredijilik mirasyny öwrenmäge, dünýäde giňden wagyz etmäge, nesilleri milli gymmatlyklarymyza, däp-dessurlarymyza hormat goýmak ruhunda, ynsanperwer häsiýetlerde terbiýelemäge uly goşandyny goşmak arkaly dürli ulgamlarda zähmet çekip, aýratyn tapawutlanandygy üçin hormatly Prezidentimiziň gol çeken resminamalaryna laýyklykda, Türkmenistanyň «Magtymguly Pyragynyň 300 ýyllygyna» atly ýubileý medaly, «Magtymguly Pyragynyň 300 ýyllygyna» atly ýadygärlik nyşanlary bilen sylaglanan raýatlarymyzyň hatarynda bedenterbiýe we sport ulgamynyň hünärmenleriniň hem bolmagy diýseň begendirýär.
10-njy dekabrda Magtymguly adyndaky Türkmen döwlet uniwersitetinde geçirilen dabarada Türkmenistanyň Bedenterbiýe we sport baradaky döwlet komitetiniň bedenterbiýe we köpçülikleýin sport çäreleri bölüminiň başlygy Gurtgeldi Garýagdyýewe, «Türkmenistan» Ýaşlar bedenterbiýe-sport guramasynyň başlygy Hydyr Orazmämmedowa, Türkmenistanyň Bedenterbiýe we sport baradaky döwlet komitetiniň başlygynyň kömekçisi Permangeldi Atamyradowa, Türkmen döwlet bedenterbiýe we sport institutynyň sportuň başa-baş tutluşyk kafedrasynyň uly mugallymy Işanguly Meretnyýazowa, Türkmenistanyň Bedenterbiýe we sport baradaky döwlet komitetiniň iş dolandyryş we desgalara gözegçilik bölüminiň başlygynyň wezipesini wagtlaýyn ýerine ýetirijisi Rüstem Saparowa, Ahal welaýatynyň bedenterbiýe we sport baradaky Baş müdirliginiň başlygynyň wezipesini wagtlaýyn ýerine ýetirijisi Guwançmyrat Seýidowa döwlet sylaglary gowşuryldy.
