Ýurdumyzyň ähli künjeginde hususy pudaga degişli guşçulyk toplumlarynyň sany barha köpelýär. Toplumlaryň hünärmenleri halkymyzy guş eti bilen bolelin üpjün etmek üçin göreldeli zähmet çekýärler. Şolaryň biri-de Gökdepe etrabynyň çäginde ýerleşýän «Altyn jüýje» hojalyk jemgyýetidir.
Guşçulyk toplumyna dünýäniň öňdebaryjy kompaniýalarynyň iň kämil, häzirki zaman tehnologiýalary ornaşdyrylandyr. Toplumda kuwwaty ýylda 5 million jüýje çykarmaga niýetlenen inkubatoryň hereket etmegi aýratyn bellenilmäge mynasypdyr. Inkubatordan çykýan jüýjelere hünärmenler kadaly ideg edýärler. Et üçin niýetlenen jüýjeler 45 günde ýetişýär. Olaryň her biriniň agramy 1,5-2 kilograma ýetýär.
