Ýakynda okuw-türgenleşik ýygnanyşygynda bolan owgan türkmenleriniň «Magtymguly Pyragy» adyndaky medeni jemgyýetiniň futzal topary paýtagtymyzyň hem-de Mary welaýatynyň toparlary bilen halkara ýoldaşlyk duşuşyklaryny geçirdi.
Ahal welaýatynyň bedenterbiýe we sport baradaky Baş müdirliginiň sport mekdebinde iki duşuşyk geçirildi. Ilkinji duşuşyk paýtagtymyzyň «Köpetdag» toparynyň peýdasyna tamamlandy – 10:6. Soňra Türkmenistanyň «Senagat» paýdarlar täjirçilik bankynyň «Senagatbanky» bilen duşuşan myhman topar birinji oýunda goýberen säwliklerinden netije çykaryp, sazlaşykly oýun görkezmäge çalyşdy. Häzirki wagtda dowam edýän ýurdumyzyň Naýbaşy futzal ligasynda ikinji orny eýeleýän, Mergen Ataýewiň tälim berýän «Senagatbank» toparynyň hem erjel çykyş edendigini bellemek gerek. Ikitaraplaýyn hüjümlerde geçen duşuşygyň 2:2 hasabynda tamamlanandygyna garamazdan, toparlaryň ikisine-de ýeňiş gazanmaga gowy mümkinçilikler döredi. Bu oýun bank işgärlerinden düzülen toparymyzyň türkmen futzalynyň mümkinçiliklerini halkara ýaryşlarda hem görkezmäge ukyplydygyny aýan etdi. Duşuşygyň öňüsyrasy «Senagatbank» toparynyň tälimçileridir oýunçylarynyň myhman toparyň türgenlerine ýadygärlik sowgatlary gowşurandyklaryny aýratyn bellemek gerek. Baýrak gowşurylyş dabarasynda bolsa duşuşyklara gatnaşyjylara dabaraly ýagdaýda Türkmenistanyň Bedenterbiýe we sport baradaky döwlet komitetiniň hem-de Türkmenistanyň Futbol federasiýasynyň taýýarlan gymmat bahaly sowgatlary gowşuryldy.
