2 – 4-nji oktýabrda paýtagtymyzyň «Olimpiýa» suw-sport toplumynda ýokary okuw mekdepleriniň, başlangyç we orta hünär okuw mekdepleriň talyplarynyň hem-de Aşgabat şäheriniň orta mekdepleriniň okuwçylarynyň arasynda «Türkmenistan – ruhubelentligiň we sagdynlygyň ýurdy» atly Uniwersiadanyň hem-de Spartakiadanyň çäklerinde suwda ýüzmek boýunça ýaryş geçirildi. Türkmenistanyň Bedenterbiýe we sport baradaky döwlet komitetiniň, «Türkmenistan» Ýaşlar bedenterbiýe-sport guramasynyň, Aşgabat şäheriniň bedenterbiýe we sport baradaky Baş müdirliginiň bilelikde guramagynda geçirilen ýaryş çekeleşikli häsiýete eýe boldy.
Şeýlelikde, ýokary mekdepleriň talyplarynyň arasynda geçirilen ýaryşda Ýagşygeldi Kakaýew adyndaky Halkara nebit we gaz uniwersitetiniň topary 1-nji orny eýeledi. Türkmenistanyň Içeri işler ministrliginiň institutynyň topary 2-nji, Türkmen döwlet bedenterbiýe we sport institutynyň topary 3-nji orunlara mynasyp boldular. Başlangyç we orta hünär okuw mekdepleriniň arasynda bolsa 1-nji orny Aşgabat energetika orta hünär okuw mekdebiniň topary eýeledi. Aşgabat şäherindäki Syýahatçylyk orta hünär okuw mekdebiniň topary 2-nji, «Türkmenhowaýollary» agentliginiň howa ulaglarynyň işgärlerini taýýarlaýan mekdebiniň topary 3-nji orunlary eýelemegi başardylar. Orta mekdepleriň arasynda 1-nji orny 15-nji orta mekdebiň topary eýeledi. 16-njy orta mekdebiň topary 2-nji, 27-nji orta mekdebiň topary 3-nji orunlara mynasyp boldular.
