Ajaýyp telediň
Hytaý Halk Respublikasynda göge uzaýan binalaryň sany juda köp. Zehinli binagärleriň iň täsin işleriniň biri Pekin şäherinde ýerleşýän Hytaýyň «CCTV» teleýaýlym merkeziniň diňidir. Bu özboluşly ajaýyp taslamanyň awtory gollandiýaly ussat arhitektor Rem Kolhasdyr. Diňiň düýbi 2004-nji ýylda tutulyp, bina 2008-nji ýylda ulanylmaga berildi. 475 müň kwadrat metr meýdany tutýan 234 metrlik bina iki sütünden ybarat bolup, depesi we aşaky bölegi özboluşly keseleýin görnüşde birigýär. 54 gatdan ybarat bu binanyň islendik uly täsirli ýertitremelerine hem çydamlylygy bellärliklidir. Binanyň içi birnäçe radiogepleşik, wideoýazgy we iş otaglaryndan ybaratdyr.
