Hormatly Prezidentimiziň baştutanlygynda ösüp gelýän nesil hakyndaky alada ýurdumyzyň döwlet syýasatynyň ileri tutulýan ugurlarynyň biri bolup durýar. Arkadagly Gahryman Serdarymyzyň ylym-bilim ulgamyny kämilleşdirmek, onuň binýadyny berkitmek, berilýän bilimiň hilini ýokarlandyrmak, ulgama dünýäniň öňdebaryjy tejribesini ornaşdyrmak baradaky tabşyryklary netijesinde amala aşyrylýan beýik işler uly üstünliklere beslenýär.
Bilşimiz ýaly, ylym-bilim islendik pudagy ösdürmegiň ilkinji şertidir. Berkarar döwletiň täze eýýamynyň Galkynyşy döwrüniň özboluşly aýratynlygy ylym-bilim ulgamynyň çalt depginlerde ösdürilmeginde, ykdysady kuwwatyň ylmy taýdan esaslandyrylyp, netijeli ulanylmagynda, halkymyzyň ýaşaýyş-durmuş üpjünçiliginiň ýokarlandyrylmagynda, şeýle hem beýleki pudaklar bilen bir hatarda, saglygy goraýyş pudagynyň kämilleşdirilmeginde has-da aýdyň duýulýar. «Pähim-paýhas ummany Magtymguly Pyragy» şygary astynda geçýän 2024-nji ýylda hem saglygy goraýyş ulgamynyň binýatlyk kuwwatyny berkitmek, bu ugurdaky ylmy gözlegleri innowasion tehnologiýalar esasynda yzygiderli ösdürmek ugrunda netijeli işler amala aşyryldy. Paýtagtymyzda Saglygy goraýyş we derman senagaty işgärleriniň güni mynasybetli 400 orunlyk Halkara sagaldyş-dikeldiş merkezi, 250 orunlyk Halkara fiziologiýa ylmy-kliniki merkezi açylyp ulanylmaga berildi. Bu täze, döwrebap binalarda halkymyza ýokary hilli saglyk hyzmatlaryny ýola goýmak bilen bir hatarda, täze-täze ylmy gözlegleri alyp barmaga hem ähli zerur mümkinçilikler bar. Şeýle hem, şanly ýylymyzda Gahryman Arkadagymyzyň «Türkmenistanyň dermanlyk ösümlikleri» atly köp jiltli ylmy-ensiklopedik kitabynyň 16-njy jiltiniň çapdan çykmagy ähli halkymyzda, aýratyn hem, biz — ýaşlarda çuňňur buýsanç duýgularyny döretdi.
