Ýurdumyzda bazar bolçulygyny berkitmekde, halkymyzy ýokary hilli azyk önümleri bilen üpjün etmekde obasenagat toplumynyň balykçylyk pudagyna-da möhüm orun degişlidir. Ähli ugurlarda uly ösüşleri nazarlaýan hususy telekeçiler bu pudagyň ösüşine mynasyp goşant goşýarlar. Türkmenistanyň Senagatçylar we telekeçiler birleşmesiniň agzasy «Täze balyk» hojalyk jemgyýetiniň alyp barýan işleri-de munuň aýdyň güwäsidir.
Birnäçe ýyl mundan ozal döwlet eýeçiligindäki kärhanalary hususylaşdyrmak arkaly olaryň netijeliligini ýokarlandyrmak boýunça işleriň çäklerinde ýurdumyzyň balykçylyk hojalyklary hususy telekeçileriň ygtyýaryna berildi. «Täze balyk» hojalyk jemgyýeti hem birnäçe ýyldan bäri döwrebap işleri ýola goýup, oňyn netijeleri gazanýar. Mary welaýatynyň telekeçileri «Hanhowuz», «Saryýazy» suw howdanlarynda çapak, kepir, kiçi we uly taran, tüňňümaňlaý, kiçi we uly daban, gyzylteňňe ýaly balyklary tutup, ilata ýokumly azyk önümini ýetirmekde uly öňegidişlikleri gazanýarlar. Bu howdanlardaky we köllerdäki balyklaryň tebigy şertlerde köpelip ýetişýändigini bellemek gerek.
