Berkarar döwletiň täze eýýamynyň Galkynyşy döwründe alym Arkadagymyzyň ylmy-tehniki başlangyçlary hem-de hormatly Prezidentimiz Arkadagly Serdarymyzyň degişli çözgütleri, durmuşa geçirilýän öňdengörüjilikli ylmy esasly döwlet syýasaty ýurdumyzyň innowasion ösüşinde ylmyň kuwwatyny we ornuny pugtalandyrmaga gönükdirilendir. Garaşsyz Watanymyzy okgunly ösdürmek, dünýäniň syýasy, ykdysady, medeni giňişliginde bäsdeşlige ukyplylygyny ýokarlandyrmak ugrunda bimöçber işler amala aşyrylýar. Her ýyl ylmyň ösdürilmegine döwlet tarapyndan berilýän goldaw giňeldilýär, geljegi uly barlaglary, tejribe-synag we tehnologik işläp taýýarlamalary maliýeleşdirmek işi gowulandyrylýar. Ýurdumyzda ylmy işleri amala aşyrmak, ylmy gözlegleriň gerimini giňeltmek, olaryň netijelerini işe ornaşdyrmak üçin hemme şertler döredilýär. Ylmy edaralaryň we ýokary okuw mekdepleriniň maddy-enjamlaýyn binýady pugtalandyrylýar, olaryň işine iň täze maglumat-aragatnaşyk tehnologiýalary, şol sanda elektron kitaphanalara hem-de dünýä maglumatlar gaznasyna ýokary tizlikli elýeterlilik giňden ornaşdyrylýar.
Alym Arkadagymyzyň hut özüniň başlangyjy we täzeçil ylmy-tehniki syýasaty netijesinde ylym ulgamyny ösdürmeklige çynlakaý çemeleşilip, 2009-njy ýylyň 12-nji iýunynda degişli Kararyň kabul edilmegi bilen, Türkmenistanyň Ylymlar akademiýasynyň işi täzeden ýola goýuldy.
