Ösüş-özgertmelere beslenen täze taryhy döwrümiziň her bir güni köňülleri joşa getirýän ajaýyp wakalara, şatlykly pursatlara sapýar. Hormatly Prezidentimiziň gatnaşmagynda 1-nji awgustda «Awaza» milli syýahatçylyk zolagynda «Rowaç» kottejler toplumynyň açylmagy ýatdan çykmajak şatlykly wakalaryň birine öwrüldi. Bu döwrebap toplum Hazaryň türkmen kenaryna özboluşly görkanalyk goşdy.
Gojaman Hazaryň ekologiýa taýdan arassa türkmen kenaryndaky syýahatçylyk zolagy göreniň akylyny haýrana goýýar. Sebitiň dürdänesine öwrülen bu gözel künjekde gysga taryhy döwrüň içinde gurlan desgalaryň arasynda kaşaň myhmanhanalaryň, sagaldyş merkezleriniň, sport we kottejler toplumlarynyň, seýilgähleriň, suw çüwdürimleriniň we şypahana-syýahatçylyk ugurlaryna mahsus beýleki düzümleýin desgalaryň bolmagy has-da guwandyrýar.
