Hormatly Prezidentimiziň tagallalarynyň netijesinde köpçülikleýin bedenterbiýe hereketiniň we sportuň pajarlap ösýän ýurduna öwrülen Türkmenistanda iri halkara sport bäsleşikleri yzygiderli geçirilýär. 2017-nji ýylda Diýarymyzda Ýapyk binalarda we söweş sungaty boýunça V Aziýa oýunlarynyň, 2018-nji ýylda Amul — Hazar halkara awtorallisiniň we Agyr atletika boýunça dünýä çempionatynyň üstünlikli geçirilmegi munuň aýdyň subutnamasydyr. Häzirki wagtda ýurdumyzda Welotrek boýunça dünýä çempionatyny ýokary derejede guramaga taýýarlyk görülýär.
9-njy martda hormatly Prezidentimiz Gurbanguly Berdimuhamedow «ARETI» halkara kompaniýalar toparynyň ýolbaşçysy, Halkara welosipedçiler birleşiginiň (UCI) Ýolbaşçy komitetiniň agzasy Igor Makarowy kabul etdi. Kabul edişlikde şu ýylyň 13 — 17-nji oktýabrynda geçiriljek Welotrek boýunça dünýä çempionatyna taýýarlyk görmek meseleleri ara alnyp maslahatlaşyldy.
