Häzirki döwürde ýurdumyzyň durnukly ykdysady ösüşini üpjün edýän taryhy ähmiýetli düýpli özgertmeler üstünlikli durmuşa geçirilýär. Türkmenistan milli ykdysadyýetiň çalt depginler bilen ösýän şertlerinde dünýäniň dürli döwletleri bilen ýokary tehnologiýaly pudaklarda hyzmatdaşlyk etmäge, häzirki zamanyň öňdebaryjy bilimlerini we dolandyryş çözgütlerini ornaşdyrmaga uly ähmiýet berýär. Milli ykdysadyýetiň durnukly ösüşine we ilatyň durmuş derejesiniň ýokarlandyrylmagyna ýardam berýän oňyn şertleri döretmek, dünýäniň hojalyk gatnaşyklaryna işjeň gatnaşmak, daşary ykdysady hyzmatdaşlygy has-da ösdürmek, iri maýa goýumlaryny ýurdumyza çekmek ýaly wajyp wezipeler ileri tutulýar. Ýurdumyzda gazanylýan oňyn ykdysady netijeler milli bähbitleriň täze mazmun bilen baýlaşdyrylmagyna täsirini ýetirýär. Ýurduň ylmy-tehniki kuwwaty çalt ösýän bolsa, onda ykdysadyýet hem durnukly ösüşini dowam etdirýär. Buýsandyryjy innowasion ösüşler täze tehnologiýalar, hyzmatlaryň görnüşi, önümler, önümçilik, dolandyryş maliýe we beýleki guramaçylyk-tehniki çözgütler arkaly gazanylýar. Innowasiýalar kärhananyň maliýe taýdan kuwwatlanmagynyň wajyp şerti bolup durýar. Olar ykdysady amallara üýtgeşmeleri girizip, deňagramlylygy üpjün edýär. Ylmyň gazananlarynyň yzygiderli önümçilige hem-de durmuşa ornaşdyrylmagy ykdysady ösüşe, halkyň hal-ýagdaýynyň ýokarlanmagyna getirýär. Innowasion syýasat ylmy, tehnikany, önümçiligi, bilimi toplumlaýyn wezipeler bilen birleşdirip, intellektual baýlyklaryň, ýokary tehnologiýaly önümçiligiň, ykdysadyýetiň öňdebaryjy ornuny gazanmaga gönükdirýär. Innowasion ykdysadyýetde ylym jemi içerki önümiň esasy ösüşini üpjün edýär. Intellektual mümkinçiligiň ýeten täze derejesi jemgyýetiň ösüşini häsiýetlendirýär.
Hormatly Prezidentimiz Serdar Berdimuhamedow Türkmenistanyň Halk Maslahatynyň mejlisinde eden çykyşynda: «Ýakyn günlerde biz Gyzylarbat etrabynda gurlan köpugurly Gün we ýel elektrik stansiýasynyň açylyş dabarasyna gatnaşarys» diýip, ýurdumyzda innowasion çözgütler esasynda energiýanyň dikeldilýän görnüşlerini ulanmaga girişilýändigini aýan etdi. Hormatly Prezidentimiziň «Türkmenistanyň ylym ulgamyny ösdürmegiň 2024 — 2052-nji ýyllar üçin Strategiýasyny tassyklamak hakynda» kabul eden Permany ýurdumyzyň ylym ulgamyny ösdürmek, öňdebaryjy tehnologiýalary döretmek, ylmyň gazananlaryny ykdysadyýetimiziň pudaklaryna ornaşdyrmak maksadyna gönükdirilendir. «Türkmenistanda sanly ykdysadyýeti ösdürmegiň 2021 — 2025-nji ýyllar üçin Döwlet maksatnamasyna» laýyklykda, sanly we mobil hyzmatlarynyň ählumumy elýeterliligi üpjün edilýär. Ýurdumyzda ýokary tehnologiýaly pudaklar, şol sanda elektron senagat giň gerimde ösdürilip, «akylly» şäher, «akylly» öý ulgamlary üçin zerur bolan enjamlaryň önümçiligi ýola goýulýar. Dünýä nusgalyk Arkadag şäherinde ornaşdyrylan innowasion tehnologiýalar, sanly çözgütler ilatyň rahat we amatly durmuş şertlerini üpjün edýär.
