Düýn paýtagtymyzdaky «Arçabil» myhmanhanasynda Garaşsyz Döwletleriň Arkalaşygyna agza ýurtlaryň weterinariýa boýunça Hökümetara geňeşiniň nobatdaky, 46-njy mejlisi geçirildi. Onuň dowamynda bu ugurda özara gatnaşyklaryň häzirki ýagdaýyna ser salnyp, ýakyn geljekde bilelikde ýerine ýetirilmeli işler ara alnyp maslahatlaşyldy.
Duşuşyga Garaşsyz Döwletleriň Arkalaşygyna agza ýurtlaryň weterinariýa boýunça Hökümetara geňeşiniň agzalary, Türkmenistanyň, Belarusuň, Gazagystanyň, Gyrgyzystanyň, Russiýa Federasiýasynyň, Täjigistanyň, Özbegistanyň oba hojalyk, maldarçylyk we weterinariýa boýunça ugurdaş edaralarynyň hem-de halkara guramalaryň wekilleri gatnaşdylar.
