Geçen hepdede Türkmenistanyň Döwlet haryt-çig mal biržasynyň söwdalarynda geleşikleriň 31-si hasaba alyndy.
Daşary ýurt puluna Birleşen Arap Emirlikleriniň we Owganystanyň işewür toparlarynyň wekilleri “Türkmennebit” döwlet konserniniň kärhanasynda öndürilen suwuklandyrylan gazy, gidrousulda arassalanan dizel ýangyjyny, “Türkmengaz” döwlet konserniniň kärhanasynda öndürilen suwuklandyrylan gazy, Türkiýäniň, Ukrainanyň işewürleri bolsa “Türkmenhimiýa” döwlet konserniniň kärhanasynda öndürilen karbamidi satyn aldylar. Mundan başga-da, daşary ýurt puluna BAE-niň, Gazagystanyň, Gyrgyzystanyň, Ukrainanyň telekeçilerine jins we tikinçilik önümleri, ýorgan-düşek daşlyklarynyň toplumlary, nah ýüplük, tekiz boýalan, žakkard tüýjümek önümler, portlandsement, gazlandyrylan mineral suwlar, gazlandyrylan alkogolsyz içgiler ýerlenildi. Geleşikleriň jemi bahasy ABŞ-nyň 14 million 290 müň dollaryndan gowrak boldy.
