Arkadagly Gahryman Serdarymyzyň baştutanlygynda ýurtda sagdyn durmuş ýörelgelerini ornaşdyrmaga, keselleriň öňüni almaga, lukmançylyk ulgamyna häzirki döwrüň iň kämil tehnologiýalaryny, öňdebaryjy dünýä tejribesini ornaşdyrmaga uly ähmiýet berilýär, şeýle hem döwletimiz tarapyndan lukmançylyk ulgamyna köp serişdeler goýberilýär. Ulgam «Saglyk» Döwlet maksatnamasyna laýyklykda ösdürilip, ýurdumyzyň ähli künjeklerinde häzirki zaman desgalary gurulýar.
Ýakynda hormatly Prezidentimiz ilatyň saglygyny goramaga gönükdirilen möhüm Kararlaryň birnäçesine gol çekdi. Olaryň hatarynda Türkmenistanda fiziologiýa ylmyny ösdürmegiň 2024 — 2028-nji ýyllar üçin Milli maksatnamasyny, Türkmenistanda lukmançylyk sagaldyş-dikeldiş çäreleriniň 2024 — 2028-nji ýyllar üçin Milli strategiýasyny, Türkmenistanyň immuno-öňüni alyş boýunça 2024 — 2028-nji ýyllar üçin Milli maksatnamasyny tassyklamak, Ilatyň derman serişdeleri we lukmançylyk maksatlaryna niýetlenen önümler bilen üpjün edilmegini kämilleşdirmek, Balkan, Lebap we Mary welaýatlarynda onkologiýa hassahanalarynyň gurluşygynyň taslamalaryny maliýeleşdirmek hakyndaky Kararlar bar. Olar Türkmenistanda il saglygynyň ýurt baýlygyna deňelýändiginiň nobatdaky subutnamasy bolmak bilen, ýurdumyzyň saglygy goraýyş ulgamyny mundan beýläk-de ösdürmekde möhüm ädimdir.
