Türkmenistanyň durmuş-ykdysady ösüşiniň uzak möhletleýin maksatnamasynda ýurdumyzyň adam mümkinçiliklerini ösdürmek, ilatyň saglygynyň derejesini ýokarlandyrmak, ilkinji nobatda, ösüp gelýän ýaş nesliň saglygyny pugtalandyrmak babatda saglygy goraýyş, bedenterbiýe we sport ulgamlarynyň möhüm orny kesgitlenendir. Saglygy goraýyş ulgamyndaky özgertmelerde döwrebap lukmançylyk merkezlerini gurmak, ýokary tehnologik enjamlary satyn almak boýunça göz öňünde tutulan taslamalar amala aşyrylyp, lukmanlaryň hünärini ýokarlandyrmak, olary maksatlaýyn taýýarlamak, derman üpjünçiligini kämilleşdirmek we beýlekiler boýunça netijeli işler alnyp barylýar. Keselleriň öňüni alyş işlerinde adamlaryň sagdyn durmuş ýörelgelerine eýermegine aýratyn ähmiýet berilýär.
Gahryman Arkadagymyzyň hut özüniň ýolbaşçylygynda işlenip düzülen «Saglyk» Döwlet maksatnamasy adamlaryň saglygyny berkitmekde, keselleriň öňüni almakda, aýratyn-da, ýurtda raýatlaryň ortaça ömür dowamlylygyny uzaltmagy üpjün etmekde esasy ýol-ýörelgeleri kesgitleýär. Maksatnamadan ugur alnyp, hormatly Prezidentimiziň parasatly baştutanlygynda, şeýle-de lukman Arkadagymyzyň taýsyz tagallalary bilen bu ugurda alnyp barylýan giň gerimli işleriň ýurduň baş baýlygy hasaplanýan halkyň saglygyny goramaga, ilatyň durmuş taýdan goraglylygyna gönükdirilendigini bellemek gerek.
