Düýn ýurdumyzyň Söwda-senagat edarasynda Garaşsyz Watanymyzyň mähriban aýal-gyzlarynyň hormatyna ýurdumyzda giňden bellenilýän Halkara zenanlar gününe bagyşlanan dabara geçirildi.
Hormatly Prezidentimiziň belleýşi ýaly, zenanlar baýramçylygyna gabatlanylan dabaralar hem-de çäreler aýratyn mana eýedir, çünki baý milli mirasymyzy aýawly saklamak hem-de geljekki nesillere geçirmek işinde zenanlaryň hyzmaty örän uludyr. Zenanlar dessanlaryň we rowaýatlaryň, gahrymançylykly eposlaryň, liriki gazallaryň, halk aýdymlarynyň ajaýyp gahrymanlarydyr. Zergärler olara täsin sungatyny bagyşlap, gymmat bahaly metallardan hem-de daşlardan ajaýyp şaý-sepleri döredipdirler. Zenanlaryň döreden hem-de ruhlandyran zatlaryny sanap geçmek halkymyzyň, ýurdumyzyň taryhyny beýan etmegi aňladýar.
