ÝAN, ÝÜREK!
Duşdy ýürek
Biribaryň gursaga
Salan wagty maýyl eden sazyna.
Görsene,
Arşda çalnan şol mukam
Zeminde ýaňlanýar gyzyň keşbinde,
Ýan, ýürek,
Lowla sen onuň yşkynda!
Ýar bu dar gursagy,
Çyk sen daşyna,
Ýeter şunça bendilikde ýatanyň.
«Söýgi ýeke gezek duşýar,
Galany
Öýkünme» diýilýär,
Gör,
Seni Taňry
Neneňsi ýalkapdyr,
Ilki söýgiňi
Alnyňa çykaryp
Gyzyň keşbinde!
Ýan, ýürek,
Lowla-da ataşyň bilen
Zemini telbe kyl arşyň yşkynda!
