Gurban baýramy ynsanperwerligi, ruhy tämizligi, hoşniýetliligi, belent ahlaklylygy dabaralandyrýan milli baýramdyr. Bu baýram adamlaryň arasyndaky belent ýörelgelere ýugrulan gatnaşyklary pugtalandyrýan, kalplary tämizleýän, ruhy gymmatlyklarymyzy, ahlak ýörelgelerimizi çuňlaşdyrýan, köpasyrlyk däp-dessurlarymyzy giňden ýaýbaňlandyrýan mukaddeslik derejesine ýeten özboluşly gymmatlykdyr. Berkarar döwletiň täze eýýamynyň Galkynyşy döwründe hormatly Prezidentimiziň parasatly baştutanlygynda milli däp-dessurlarymyz sarpalanyp, gadymy ýörelgelerimize uly hormat goýulýar. Bu halkymyzyň ruhy-ahlak ýörelgeleriniň giňden dabaralandyrylmagynda hem açyk-aýdyň görünýär. Şu nukdaýnazardan, Gurban baýramy hem pederlerimizden gelýän gadymy hem milli ýörelgelerimiziň esasynda giňden bellenilýär. Ýurdumyzda her ýylda üç gün dynç güni diýlip bellenilip, bagtyýar raýatlarymyzyň asylly däplerimize görä gurbanlyk dessuryny berjaý etmeklerine uly mümkinçilik döredilýär. Gurban baýramynda, ilkinji nobatda, arassaçylyk kadalary doly berjaý edilýär. Öýlerde baýramçylyga giňden taýýarlyk görülýär. Toý saçaklary ýazylyp, naz-nygmatlar bilen bezelip, myhman garşylanýar. Gurbanlyk maly soýlup, goňşy-golam, dogan-gardaş, dost-ýar, tanyş-biliş myhman çagyrylyp, gurbanlyk sadakasy berilýär.
Gurban baýramynyň ýene-de bir aýratynlygy, hormatly Prezidentimiziň sahawatly çözgüdi esasynda ildeşlerimiziň köp sanlysyna haj parzlaryny berjaý etmek üçin mümkinçiligiň döredilmegidir. Döwletlilik ýörelgelerimizden gözbaş alýan bu ajaýyp günlerde bagtyýar ildeşlerimiz yslam dünýäsiniň özboluşly merkezi bolan mukaddes ýerlerde – Mekge şäherindäki keramatly Käbede hem-de Medine şäherindäki Muhammet Pygamberiň metjidinde haj ybadatlaryny berjaý edýärler. Bu bolsa hormatly Prezidentimiziň ynsanperwerlik syýasatynyň giňden dabaralanýandygyny açyp görkezýär.