Ýakynda Garagum etrap häkimliginiň hem-de Türkmenistanyň Kärdeşler arkalaşyklarynyň Mary welaýatynyň Garagum etrap birleşmesiniň bilelikde guramaklarynda «Ussat bagban» bäsleşigi geçirildi.
Pähim-paýhas ummany Magtymguly Pyragy ýylynda geçirilen bäsleşige etrabyň daýhan birleşikleri bilen şertnama baglaşan miweli hem saýaly baglary ösdürip ýetişdirýän kärendeçiler, daýhan hojalyklarynyň agzalary, telekeçiler gatnaşdylar. Bäsleşigiň düzgünnamasyna laýyklykda, bagbanlar ýerlerde ýetişdirilen baglar, olara edilýän idegler bilen tanyşdyrdylar hem-de tejribe alyşdylar. Olar tejribeli bagban Orazguly Jüpbiýewiň 16 gektar ýerde ýetişdiren üzümleriniň görnüşleri, hasyl toplaýşy bilen içgin gyzyklandylar. Töremyrat Töraýewiň 3 gektar ýerde ösdürip ýetişdiren miweli baglary, olara edilýän ideg işleri, zyýankeşlere garşy göreş çäreleri bilen ýakyndan tanyşdylar. Soňra eminler toparynyň gatnaşmaklarynda etrap häkimliginde geçirilen maslahatda bäsleşigiň ýeňijileri Orazguly Jüpbiýewiň, Töremyrat Töräýewiň hem-de ýaş bagban Babageldi Esenowyň bagçylykda gazanan iş tejribeleriniň öwgä mynasypdygyny bellediler. «Ussat bagban» bäsleşigine gatnaşanlara Türkmenistanyň Kärdeşler arkalaşyklarynyň Mary welaýatynyň Garagum etrap birleşmesiniň gymmat bahaly sowgatlary dabaraly ýagdaýda gowşuryldy.
