Täze taryhy eýýamda bagtyýar halkymyzyň durmuşy toý-baýramlara, şanly senelere, üstünliklere we ösüşlere beslenýär. Agzybir halkymyzyň dabaraly belleýän baýramlarynyň biri-de, Türkmenistanyň Konstitusiýasynyň we Türkmenistanyň Döwlet baýdagynyň günüdir. Ata watanymyzda her ýylyň 18-nji maýynda bu baýram şanly waka hökmünde bellenmek bilen, milli senenamamyzda möhüm orny eýeleýär.
Türkmenistanyň Prezidenti Serdar Berdimuhamedow bu şanly baýram barada şeýle belleýär: «Adamy jemgyýetiň we döwletiň iň ýokary gymmatlygy hökmünde ykrar edýän Konstitusiýamyz, Garaşsyzlygymyzyň we Bitaraplygymyzyň, agzybirligimiziň hem-de jebisligimiziň ebediliginiň nyşanyna öwrülen Döwlet baýdagymyz biziň geçmişimiziň, häzirki döwrümiziň, geljegimiziň beýikdigini, şöhratlydygyny alamatlandyrýan milli mukaddesliklerimizdir».