Toý-baýramlaryň, halkara çäreleriň we forumlaryň üstünliklere beslenip geçirilýän, netijede halklaryň dost-doganlyk gatnaşyklarynyň pugtalandyrylýan mekanyna öwrülen hemişelik Bitarap döwletimiziň abraýy barha belende galýar. Biz ony eziz Diýarymyzyň bedew batly ösüşleriniň çawynyň äleme doluşyndan, halkara, sebitara, dünýä derejeli guramalaryň döwletimiziň asylly başlangyçlaryny adamzat abadançylygyna, ruhy kämilligine gönükdirilen bähbit hökmünde kabul etmeklerinden we halkymyzyň edebi, medeni, milli gymmatlyklaryny eşretli durmuşyň, barlygyň genji-hazynasy bilmeklerinden hem görýäris. Milli Liderimiziň ylhamy, döwlet Baştutanymyzyň taýsyz tagallalary esasynda kemala gelýän sebitiň ilkinji «akylly» şäherinde 12-nji oktýabrda geçirilen maslahat hem munuň golaýdaky görkezijileriniň biridir.
Aba Annaýew adyndaky Halkara atçylyk akademiýasynda guralan maslahatda Birleşen Milletler Guramasynyň Bilim, ylym we medeniýet meseleleri boýunça guramasynyň (ÝUNESKO-nyň) Baş konferensiýasynyň başlygy hanym Simona Mikelesku «Ahalteke atçylyk sungaty we atlary bezemek däpleri» atly milli hödürnamanyň ÝUNESKO-nyň Adamzadyň maddy däl medeni mirasynyň sanawyna girizilendigi baradaky şahadatnamany gowşurdy. Bu şatlykly waka maslahata gatnaşyjylaryň göwün guşuny göge göterdi. Maslahatda hormatly myhmanyň hem-de halypa ildeşlerimiziň birnäçesiniň joşgunly çykyşlary diňlenildi. Olarda türkmen halkynyň Milli Lideri Gahryman Arkadagymyzyň, pederleriň ýoluna eýerip, milli ýörelgämizi Ýer ýüzünde dabaralandyrýan Arkadagly Gahryman Serdarymyzyň ynsan gylykly, ýelden ýyndam ahalteke bedewleriniň baş sanynyň artdyrylmagynda, tohum arassalygynyň saklanylmagynda, talabalaýyk idedilmeginde, ösdürilip ýetişdirilmeginde, seýisçilik sungatynda, mynasyp bezelmeginde, sylagdyr serpaýlarynyň ýetirilmeginde taýsyz tagallalary edýändikleri we nusgalyk mekdebe, baş Halypa öwrülendikleri nygtaldy. Şeýle-de milli hödürnamanyň bu abraýly sanawa girizmek baradaky çözgüdiniň Arkadag Serdarly bagtyýar ýaşlar ýylynyň 5 — 9-njy dekabrynda dünýä derejeli Guramanyň Maddy däl medeni mirasy goramak boýunça hökümetara komitetiniň Botswana Respublikasynyň Kasane şäherinde guralan 18-nji mejlisinde kabul edilendigi we topara agza döwletleriň 24-si tarapyndan gyzgyn goldawa eýe bolandygy aýdyldy.
