Watan goragy mukaddesdir
Bu jümle diňe harby gullukçylaryň däl, eýsem, ähli raýatlarymyzyň ýüreginde-de ýer alandyr. Çünki Oguz han atamyzdan gözbaş alyp gaýdýan watansöýüjilik duýgusy her bir türkmeniň ganynda, aňynda bar. Şoňa görä, ýurdumyzyň harby we hukuk goraýjy edaralarynyň ähli düzümleri işlerini sazlaşykly ýola goýup, jemgyýetimiziň asudalygynyň, abadançylygynyň goragynda sak durýarlar. Mälim bolşy ýaly, 2-nji iýunda Döwlet howpsuzlyk geňeşiniň nobatdaky mejlisi geçirildi. Onuň dowamynda harby we hukuk goraýjy edaralaryň şu ýylyň bäş aýynda ýerine ýetiren işleriniň jemlerine garaldy, bu düzümleriň ýakyn geljek üçin işleriniň ileri tutulýan ugurlary kesgitlenildi. Şeýle hem onuň gün tertibine Garaşsyz ýurdumyzda howpsuzlygy, parahatçylygy üpjün etmek, harby we hukuk goraýjy edaralaryň maddy-enjamlaýyn binýadyny berkitmek, olaryň işini kämilleşdirmek, döwlet emläginiň, şol sanda maliýe serişdeleriniň netijeli peýdalanylyşyna, sanly ulgamyň ornaşdyrylyşyna gözegçilik etmek bilen baglanyşykly meseleler girizildi.