Hormatly Prezidentimiziň parasatly baştutanlygynda ýurdumyz ähli babatda ösüşleri gazanyp, dünýäniň hojalyk gatnaşyklaryna işjeň goşulyşýar. 9-njy oktýabrda döwlet Baştutanymyz Gurbanguly Berdimuhamedow Birleşen Arap Emirliklerine iş saparyny amala aşyryp, Dubaý şäherinde geçirilýän «EKSPO — 2020» Bütindünýä sergisiniň çäklerinde guralan Türkmenistanyň milli gününe gatnaşdy.
Hormatly Prezidentimiziň uçary Aşgabat — Dubaý ugry boýunça uçuşy amala aşyrandan soň, şeýh Maktum adyndaky Halkara howa menziline gelip gondy. Bu ýerde milli Liderimizi BAE-niň energetika ministri Suhail Mohamed Al Mazrui garşylady. Döwlet Baştutanymyzyň awtoulag kerweni howa menzilinden çykyp, «EKSPO — 2020» sergi toplumyna ugrady.
