Garaşsyz, hemişelik Bitarap Türkmenistanyň taryhynda Halk Maslahaty diýen düşünjäniň ýörgünli bolandygyny hemmämiz bilýäris. Halk Maslahaty Berkarar döwletimizi berkitmegiň berk binýatlaryny döretmegiň iň esasy syýasy-jemgyýetçilik gurallarynyň birine öwrüldi. Milli demokratiýanyň ýurduň syýasy durmuşynda möhüm hereketlendiriji güýje öwrülmeginde Halk Maslahatynyň mejlisleriniň aýratyn orny bardyr.
2020-nji ýylda geçirilen konstitusion özgertme netijesinde Türkmenistanyň Halk Maslahatynyň hukuk derejesi özgerdilip, bu umumymilli forum döwlet häkimiýet edaralarynyň ulgamyna goşuldy. Esasy Kanunymyzyň 2020-nji ýylda kabul edilen rejelenen görnüşiniň 66-njy maddasynda: «Türkmenistanda ýokary döwlet häkimiýetini Türkmenistanyň Prezidenti, Türkmenistanyň Milli Geňeşi (Halk Maslahaty we Mejlis), Türkmenistanyň Ministrler Kabineti we Türkmenistanyň Ýokary Kazyýeti amala aşyrýarlar» diýlip kesgitlenildi. Ýurdumyzda 2021-nji ýylyň 28-nji martynda Türkmenistanyň Kostitusiýasyna hem-de Saýlaw kodeksine laýyklykda, şeýle hem Halk Maslahatynyň karary esasynda Türkmenistanyň Milli Geňeşiniň Halk Maslahatynyň agzalarynyň ilkinji saýlawlary geçirildi.