Germaniýa Federatiw Respublikasynyň Kansleri Angela Merkel Beýik Britaniýa iň soňky iş saparyny amala aşyryp, Premýer-ministr Boris Jonson bilen duşuşdy. Bu sapar 2005-nji ýyldan, Merkeliň Kansler bolup işe başlan döwründen bäri 22-nji saparydyr. Indi onuň ygtyýarlyk möhleti gutarýar. 26-njy sentýabrda Germaniýada Parlament saýlawlary geçirilip, Angela Merkel federal hökümetiň başlygy wezipesine öz dalaşgärligini gaýtadan hödürlemejekdigini aýtdy. Duşuşygyň barşynda iki ýurduň ýolbaşçylary London bilen Berliniň arasyndaky hyzmatdaşlygy çuňlaşdyrmak barada pikir alyşdylar.
– Merkeliň Kansler wezipesinde işlän 16 ýyldan gowrak wagtynyň içinde Beýik Britaniýa bilen Germaniýanyň arasyndaky gatnaşyklar ösüp, täze döwre gadam basdy. Beýik Britaniýany we Germaniýany köp meselelerde mäkäm dostluk hem-de umumy garaýyşlar baglanyşdyrýar. Biziň alymlarymyz, oýlap tapyjylarymyz we senagatçylarymyz dünýäni has-da gowulandyrmak maksady bilen bilelikde işleýärler – diýip, Beýik Britaniýanyň Premýer-ministri Boris Jonson belledi. Merkel bilen Jonson taraplaryň tejribe alyşmagyny üpjün etmek we hyzmatdaşlygy artdyrmak maksady bilen iki ýurduň Ministrler Kabinetiniň her ýylky ýygnagyny geçirmek barada ylalaşyk gazandylar.