Fransuz kino sungatynyň altyn döwrüniň iň tanymal aktýorlaryndan bolan Alan Delon 1935-nji ýylyň 8-nji noýabrynda Parižiň golaýyndaky So diýen ýerde dünýä inýär. 1950-nji ýyllaryň ikinji ýarymyndan başlap, kino sungatyna aralaşan aktýor 90-a golaý filmde ululy-kiçili keşpleri janlandyrýar. Ol Ren Klemen, Kristian Žak, Žan-Pier Melwill, Luçino Wiskonti, Miçelanhelo Antonioni ýaly ussat režissýorlaryň filmlerinde surata düşdi. Oňa ilkinji şöhrat getiren keşp Ren Klemeniň «Has ýiti gün» (Plein Soleil) filmindäki Tom Ripliniň keşbi boldy. Alan Delonyň meşhur filmleriniň hatarynda «Günüň ýaşmagy» (L’Eclisse, 1962), «Alajagaplaň» (Il gattopardo, 1963), «Gara çigildem» (La Tulipe noire, 1964), «Samuraý» (Le Samourai, 1967), «Ýüzüş howzy» (La Piscine, 1969), «Sisiliýa klany» (Le clan des Siciliens, 1969), «Borsalino» (Borsalino, 1970), «Gyzyl halka» (Le Cercle Rouge, 1970) ýaly ilhalar kinolary görkezmek bolar. Delonyň «Alajagaplaň», «Samuraý» filmleri nusgawy filmleriň hatarynda bolup, olaryň ikisi kino sungatynyň kult eserleri hökmünde görülýär.
Alan Delon 60 ýyldan gowrak karýerasynda egindeşleri – aktýorlar Žan-Pol Belmando, Burt Lankaster, Iw Montan, aktrisalar Jeýn Fonda, Romi Şneýder, Brigitte Bardo dagy bilen ençeme keşpleri paýlaşdy. 1985-nji ýylda «Biziň hekaýamyz» filmindäki keşbi üçin iň gowy aktýor ugry boýunça Sezar baýragyny alan aktýora 1995-nji ýylda Berlin film festiwalynda «Altyn aýy», 2009-njy ýylda Kann film festiwalynda bolsa «Altyn palma» hormat sylaglary gowşurylýar.
