Kaka etrabynyň 10-njy çagalar bagynda çagalar baglarynyň müdirleriniň we usulçy terbiýeçileriniň arasynda usuly-amaly maslahat geçirildi. Türkmenistanyň Prezidentiniň Karary bilen tassyklanan “Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasyna” laýyklykda, pedagogik işgärleriniň öňünde durýan maksatlar we ýerine ýetirilmeli işler usuly-amaly maslahatdaky pikir alyşmalaryň özeni boldy.
Etrap bilim bölümi tarapyndan guralan usuly-amaly maslahatda agzalan Konsepsiýanyň ähmiýeti we maksady hakda giňişleýin durlup geçildi. Bellenilişi ýaly, “Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasynyň” esasy maksady umumybilim maksatnamalar boýunça okatmagyň usulyýetini döwrebaplaşdyrmagyň esasynda dünýä jemgyýetçiliginde Garaşsyz, hemişelik Bitarap Türkmenistanyň bähbitlerini goramaga taýýar, çuňňur bilimli, döredijilikli pikirlenip bilýän, watansöýüji, zähmetsöýer, ahlak taýdan arassa, hemmetaraplaýyn sazlaşykly ösen kämil şahsyýetleri kemala getirmekden we ösdürmekden ybaratdyr. Şoňa görä-de, bu Konsepsiýanyň kabul edilmegi mekdebe çenli ýaşly çagalar edaralaryna jogap berýän ýolbaşçylara has-da döredijilikli işlemäge uly itergi berdi.
