Berkarar döwletimiziň bagtyýarlyk döwründe ýagty geljegimiz bolan ýaş nesliň Watana, il-ýurda wepaly bolmagy üçin ähli döwrebap şertlerdir mümkinçilikler döredilýär. Çagalaryň döwrebap bilim hem göwnejaý dynç almaklary, wagtyny şadyýan, peýdaly geçirmekleri bilen baglanyşykly işler hormatly Prezidentimiziň durmuş ulgamyny nazarlaýan syýasatynyň esasy ugurlarynyň biridir.
Tomusky dynç alyş merkezlerinde we meýdançalarynda ýangyn howpsuzlygynyň talaplaryny berjaý etmek üçin, her bir terbiýeçiniň we işçi-gullukçylaryň ýangyn howpsuzlyk düzgünlerini bilmekleri hem-de şol düzgünleriň talaplaryny ýerine ýetirmekleri hökmanydyr. Köpçülikleýin çäreleriň geçirilýän jaýlarynda adam başyna 0,75 inedördül hasabynda näçe adam ýerleşdirilmelidigini kesgitleýji hasaplamalar geçirilmelidir. Merkezlerde we meýdançalarda ýaş ýangyn söndüriji toparlar döredilmelidir. Hapa zir-zibiller, esasan hem tomus paslynda ýangyn howply guran haşal otlar öz wagtynda arassalanmalydyr. Guran haşal otlary ýakmak gadagandyr.
