Düýn — 16-njy dekabrda paýtagtymyzdaky Türkmenistanyň Söwda-senagat edarasynda Eýran Yslam Respublikasynyň «Iran Agrofood» atly 16-njy ýöriteleşdirilen sergisi we Türkmen-eýran işewürlik maslahaty öz işine başlady. 18-nji dekabra çenli dowam edýän forumda dostlukly ýurduň ykdysadyýetiniň esasy pudaklarynyň biri bolan oba hojalygynda we azyk senagatynda gazanylan üstünlikler we tejribeler tanyşdyrylýar.
Däp bolşy ýaly, forumyň açylyş dabarasyna Hökümet agzalary, ministrlikleriň we pudaklaýyn dolandyryş edaralarynyň ýolbaşçylary, daşary ýurtlaryň we halkara guramalaryň Türkmenistandaky wekilhanalarynyň, ýurdumyzyň köpçülikleýin habar beriş serişdeleriniň we ýokary okuw mekdepleriniň wekilleri, şeýle-de işewürler gatnaşdy. Dabaranyň dowamynda hormatly Prezidentimiziň Eýran Yslam Respublikasynyň «Iran Agrofood» atly 16-njy ýöriteleşdirilen sergisine we Türkmen-eýran işewürlik maslahatyna gatnaşyjylara iberen Gutlagy okaldy. Gutlagda bu giň möçberli çäreleriň ýurtlarymyzyň arasyndaky hoşniýetli goňşuçylyga esaslanýan dost-doganlyk gatnaşyklarynyň pugtalandyrylmagyna, söwda-ykdysady hyzmatdaşlygyň has-da giňeldilmegine uly itergi berjekdigine berk ynam bildirilýär.
