Raýatlaryň saglygyny goramak we jemgyýetiň sagdynlygy hakynda aladalanmak döwletiň öňündäki möhüm wezipeleriň hatarynda durýar. Hut şoňa görä-de, Berkarar döwletiň täze eýýamynyň Galkynyşy döwründe hormatly Prezidentimiziň baştutanlygynda ýurdumyzda sporty we bedenterbiýäni, şeýle hem sport medeniýetini ösdürmäge aýratyn ähmiýet berilýär. Raýatlaryň saglygyny goramak üçin kanunçylyk özgertmelerini amala aşyrmak bilen birlikde, döwrebap lukmançylyk düzümleri, sagaldyş-dikeldiş merkezleri işe girizilýär.
Türkmen halkynyň Milli Lideri Gahryman Arkadagymyzyň başlangyjy bilen kabul edilen «Saglyk» Döwlet maksatnamasy häzirki döwürde-de üstünlikli amala aşyrylýar. Baş maksady ilatyň saglygyny goramak, adamlaryň ömrüniň dowamlylygyny uzaltmak hem-de jemgyýetiň hemmetaraplaýyn ösmegini üpjün etmek bolup durýan bu Maksatnamanyň çäklerinde giň gerimli işler alnyp barylýar. Milli saglygy goraýyş ulgamynyň binýadyny berkitmek maksady bilen, kanunçylyk namalary yzygiderli kämilleşdirilýär. «Raýatlaryň saglygynyň goralmagy hakynda», «Iýmit önümleriniň howpsuzlygynyň we hiliniň üpjün edilmegi hakynda», «Raýatlaryň saglygynyň temmäki tüssesiniň täsirinden we temmäki önümlerini ulanmagyň netijelerinden goralmagy hakynda», «Ýokanç keselleriň öňüni almak hakynda» Türkmenistanyň Kanunlary munuň aýdyň mysalydyr.
