Ministrler Kabinetiniň golaýda sanly ulgam arkaly geçirilen mejlisinde şu ýylyň ýanwar — sentýabr aýlarynda ýurdumyzyň durmuş-ykdysady ösüşinde gazanylan netijelere seljerme berildi hem-de öňde durýan wezipeler kesgitlenildi. Hasabat döwründe ykdysady ösüşi häsiýetlendirýän makroykdysady görkezijileriň biri bolan jemi içerki önümiň 6,3 göterim artmagy maksatnamalaýyn çemeleşmäniň netijeliligini ýene-de bir gezek tassyklady. Häzirki döwürde hereket edýän köp sanly maksatnamalarda we konsepsiýalarda kesgitlenen anyk wezipeleriňdir ugurlaryň ösüşiň täze menzillerini nazarlamagyň hereketlendiriji güýjüne öwrülendigi geljekki üstünliklere giň ýol açýar.
Islendik ýurduň ykdysady ösüşine baha berlende, birnäçe görkezijilerden ugur alynýar. Şunda ykdysadyýetiň pudaklary boýunça öndürilen içerki hem-de jemi öndürilen önümler ulgamyň häzirki ýagdaýyny häsiýetlendirmäge mümkinçilik berýär. Mejlisde, 2023-nji ýylyň degişli döwri bilen deňeşdirilende, jemi öndürilen önümiň 11,7 göterim artandygy bellenildi. Bu görkeziji ýurtda jemlenen tebigy, zähmet we maliýe serişdelerini ulanmagyň netijesinde öndürilen önümiň hem-de ýerine ýetirilen hyzmatlaryň möçberiniň ösüş meýline eýe bolandygyny aňlatmak bilen birlikde, öň bar bolan, şeýle-de täze döredilen kärhanalardyr edaralar tarapyndan tölenilýän salgydyň möçberiniň ýokarlanmagyna getirendigine-de güwä geçýär. Salgyt töleýjileriň sanynyň artmagy bilen, Döwlet býujetiniň girdeji böleginiň ýokarlanmagy kanunalaýyk ýagdaýlaryň biri bolup durýar. Ol önümçilik kärhanalarynyň sanynyň köpelmegi arkaly ýurduň ykdysady kuwwatynyň pugtalanýandygyna, maliýe ýagdaýynyň gowulanýandygyna göz ýetirmäge mümkinçilik berýär. Şeýle arabaglanyşyk bar bolan mümkinçilikleriň ösüşiň bähbidine ulanylan ýagdaýynda ykdysady netijeliligiň ýokarlanmagyna getirýändigini görkezýär. Geçen ýylyň degişli döwri bilen deňeşdirilende, şu ýylyň ýanwar — sentýabr aýlary boýunça Döwlet býujetiniň girdeji böleginiň 102,4 göterim artmagyny şu deliller bilen esaslandyryp bolar.
