«7/24. tm», № 14 (149), 03.04.2023.
Ýurdumyzda halkyň saglygyny goramak, sporty ösdürmek, sagdyn jemgyýeti kemala getirmek döwlet syýasatynyň ileri tutulýan ugurlarynyň biri hökmünde kesgitlenýär. Şonuň esasynda hem, Watanymyzda bedenterbiýe we sport çäreleri yzygiderli we ýokary derejede geçirilýär. Diýarymyzyň ähli künjeginde giňden bellenilýän Bütindünýä saglyk güni hem şeýle ajaýyp sport baýramlarynyň naýbaşysydyr. Bu halkara baýramda ýurdumyzyň welaýatlarynda we paýtagtymyzda ýaýbaňlandyrylýan welosipedli ýörişler tebigatyň gözelligi bilen ajaýyp sazlaşygy emele getirip, arassa ekologiki gurşawyň ähmiýetini dabaralandyrýar. Türkmenistanda sportuň bu görnüşini giňden wagyz etmek boýunça amala aşyrylýan maksatnamalaýyn çäreleriň anyk netijeleri berýändigi dürli ýaşdaky watandaşlarymyzyň geçirilýän köpçülikleýin welosipedli çärelere diýseň işjeň gatnaşýandygynda öz beýanyny tapýar. Munuň özi ýurdumyzda welosportuň ösdürilmegi babatda alnyp barylýan giň gerimli işleriň, ekologiýa ulagy bolan welosiped sürmegi wagyz etmek barada edilýän tagallalaryň halkara derejesinde ykrar edilýändigini görkezýär.