Küýsegi saz, diregi söz bolan pederlerimiz heňňamlara uzajak, üstünden döwürler aşyp, könelmejek medeni mirasy nesilleriniň kalbyna guýmagy başarypdyrlar. Şahandazlyk, sahylyk, halallyk, mertlik, gaýduwsyzlyk, myhmansöýerlik ýaly asylly häsiýetleri ýol-ýörelge edinen danyşment halkymyzyň baran ýeri gür baglyk, basan ýeri gülzarlyk bolupdyr. Geçmişe ser salsaň, ata-babalarymyzyň baý durmuş tejribesinde ýerlikli aýdylan sözüň, parahatlyga gönükdirilen sazyň gylyjyň güýjünden-de rüstem gelendigini inkär edip bolmajak, kän-kän delilleriň üsti bilen mysal getirse bolar. Ylaýta-da, hormatly Prezidentimiziň «Parahatçylyk sazy, dostluk, doganlyk sazy», «Ile döwlet geler bolsa...» ýaly dürdäne kitaplaryna ýüzlenäýmeli.
Ykdysadyýet zerur serişdeleri sarp edip, medeniýetiň ösmegine önjeýli goşant goşýan bolsa, medeniýet hem öz gezeginde köptaraplaýyn döwletara gatnaşyklaryň rowaçlanmagyna itergi berip, ykdysadyýetiň ösmegine taýsyz goldaw döredýär. Şol sebäpli-de ýurdumyzda «Türkmenistanda Medeniýet ulgamyny ösdürmegiň 2019 — 2025-nji ýyllar üçin Maksatnamasy» «Türkmenistanyň Prezidentiniň ýurdumyzy 2019 — 2025-nji ýyllarda durmuş-ykdysady taýdan ösdürmegiň Maksatnamasynyň» düzüm bölegi hökmünde kabul edildi. Bu maksatnamalar iş ýüzünde öz ýokary netijelerini berdi. Muňa mysal hökmünde ýurdumyzyň medeni ojaklarynda, tomaşa jaýlarynda we beýleki medeni-dynç alyş edaralarynda halkymyza medeni taýdan hyzmat etmegiň häzirki zaman mümkinçilikleri, kämil iş usullary yzygiderli ornaşdyrylýar. Obalarda we şäherlerde yzygiderli gurlup, ulanmaga berilýän medeniýet öýleriniň häzirki zaman ajaýyp binalarynda hünärmenleriň döredijilikli işlemekleri, ilata medeni taýdan hyzmat etmekleri üçin ähli zerur şertler döredilýär.