Şu gün gadymy Lebap ilinde Medeniýet hepdeligi başlanýar. Hepdeligiň çäginde ýurdumyzyň ähli welaýatlaryndan hem-de paýtagtymyzdan gelen ýazyjy-şahyrlaryň gatnaşmaklarynda nusgawy şahyrymyz Magtymguly Pyragynyň döredijiligine bagyşlanan duşuşyklar, çeper okaýyşlar guralar. Akyldar şahyrymyz dünýä edebiýatynyň altyn hazynasyna giren dürdäne şygyrlaryny bize miras galdyrdy.
Hormatly Prezidentimiz edebi mirasymyza uly sarpa goýýar. Berkarar döwletiň bagtyýarlyk döwründe milli mirasymyzy öwrenmekde we ony halka elýeterli etmekde alnyp barylýan işler göwünleri galkyndyrýar. Garaşsyz Watanymyzda türkmen nusgawy edebiýatynyň görnükli wekili Magtymguly Pyragynyň edebi mirasyny täzeçe röwüşde öwrenmeklik ýola goýlup, bu ugurda tutumly işler amal edilýär. Türkmen edebiýaty öwreniş ylmynyň magtymgulyşynaslyk ugrunda edilen işler az däl. Türkmen alymlary Magtymguly Pyragynyň golýazma mirasyny öwrenmekde we olaryň esasynda şahyryň şygyrlaryny neşire taýýarlap, ony halk köpçüligine ýetirmekde uly tejribe toplady. Şahyryň dünýewi hem ylahy-pelsepewi goşgularynyň derňewi Magtymgulynyň şahyrana dünýägaraýşyny we şygyr çeperçilik ussatlygyny kesgitlemekde ähmiýetli boldy.
