Ata arzuwy, ene mähri bilen maşgalada perzent dünýä inýär. Ol ene-atanyň göz guwanjyna öwrülýär. «Iki aýakly iki günde» diýleni. Ene-ata halal duz iýdirip perzendini kemala getirýär. Asylly ýörelge bilen mynasyp terbiýe berýär. Gyz ene öwüdine, ogul ata göreldesine eýerýär.
Bir-biregi goldamak, gadyryny bilmek ömrüň manysydyr. Pikiriň bilen pikirdeş, göwnüň bilen göwündeş dost adama hemişe gerek. Dosty uzakdan gözlejek bolmaly däl. Ýakynlaryňy dost tutunmagy, töweregiňdäkileri dogan saýmagy başarmaly. Şonda hemişe öz ýeke däldigiňi duýarsyň.
